Photography/Poem

https://youtu.be/omIMtCDSXZk

“മുല്ലപ്പൂവിനൊരു മഴമുത്തം”

———————————–

ഈ പെയ്തിറങ്ങിയ മഴയ്ക്ക്,  “വാത്സല്യത്തിന്റെ ഗന്ധം” !

ജനാലകൾക്കിടയിലൂടെ കോരിച്ചൊരിയുന്ന മഴയെ നോക്കി കുശലം പറയുന്ന മുല്ലപ്പൂക്കളുടെ മനോഹാരിത അതൊന്ന് വേറെതന്നെ !

തന്നിലെ സൗരഭ്യം അവിടമാകെ  തളം കെട്ടിയത്  അവരറിയുന്നുവോ?

ആ മഴത്തുള്ളികൾ തങ്ങളുടെ നെറുകയിൽ തലോടിയിരുന്നുവെങ്കിൽ എന്നവർ ആശിച്ചിരിക്കാം…..

“ഞെട്ടറ്റു വീഴുമൊരുന്നാൾ  നീയാപുലരിയിൽ 

കൗതുകമുണർത്തി നിന്നിലെ മന്ദഹാസം

അലിയുന്നു നിങ്ങളിലൊരുവളായ് ഞാൻ

വീണ്ടുമൊരാ മഴയെ ആസ്വദിപ്പാൻ….”

ഈ കവിളിലൊരു മഴമുത്തവുമായി ആ  മഴത്തുള്ളികൾക്കുമുണ്ട് ചിലതൊക്കെ പറയുവാൻ…………

“പെയ്തിറങ്ങിയൊരു മഴയും

നിൻ കവിളിണയിൽ ഒരു മണിമുത്തും

പുഞ്ചിരിതൂകുമീ നിൻ കവിളിണയിൽ

കുങ്കുമമാകുമെൻ മഴമുത്തം

ഒരു കുങ്കുമമാകുമെൻ മഴമുത്തം

നിൻ കുറുമ്പുകളിൻ പാട്ടിനൊരീണമായ്

ചാറിയൊഴിഞ്ഞൊരു നേരവും കാത്തുഞാൻ

നിൻ നെറുകയിലെൻ കൈവിരലൊന്നു തലോടുമ്പോൾ

കാണുന്നു നിന്നിലെ മന്ദഹാസം….”

ഈ മഴത്തുള്ളികളുടെ വാത്സല്യം മുല്ലപ്പൂക്കളിൽ പതിയുന്ന പോലെ നിറയട്ടെ ഓരോ പിഞ്ചുമനസ്സും വാത്സല്യത്തിൻ അമൃത കണങ്ങളാൽ !!

                                     സിമി അബ്ദുൾകരീം